香港馬拉狂賺亞洲系數  亞足協急改遊戲規則保障中國澳洲

今年係香港足球近年嚟最成功嘅一年，球會層面有傑志歷史性打入亞冠盃十六強，而香港代表隊就相隔半世紀再闖亞洲盃，港超更加喺亞洲聯賽系數一下子衝上前列成為東亞三哥，有望嚟梗拎到四席亞冠席位，形勢發展對香港足球十分有利，但係別開心得太早。

近日就突然傳出壞消息，記者Martin Lowe報導亞洲足協希望仿效歐洲足協，改變其洲際賽模式。原本擴軍至四十隊嘅亞冠盃會縮減至廿四隊，而亞協盃就會取消分區制度，另外亦會再添加第三級嘅亞洲洲際賽，類似於歐洲協會聯賽。計分制度據報亦會有所改變。Martin Lowe 就指出亞洲足協係為咗保障中國同澳洲呢啲「受疫情影響」嘅協會利益，同時壓制香港同馬拉呢兩個受惠於疫情嘅協會。


突如其來嘅改制，對香港足球嚟講絕對係壞事。本身如果唔改制的話，根據現有制度，香港會有成兩個分組賽席位，再加兩個外圍賽資格。對於香港足球發展非常有利，因為香港觀眾會對呢類洲際比賽更感興趣，之前傑志喺大球場出戰亞冠比賽，入場人數就接近過萬人。假如香港能夠拎到四個亞冠資格，有香港代表嘅亞冠比賽自然會多啲，令香港足球關注度更高，各隊班主亦可能因為亞冠資格去投入多啲。

得番廿四隊打亞冠，香港代表隨時被逐出亞冠盃，抑或好少少維持原狀，得一隊香港代表可以打亞冠。兩個情況對香港足球都唔係好事，香港只可以打亞協的話，各隊投入度(連同傑志)一定再減；假如有一隊香港代表的話，依現時情況好大機會傑志永續代表，傑志繼續因為參加亞冠而獲得大量資源，繼而令到傑志港超皇朝千秋萬世，亦唔會對香港足球有太大幫助。


其實亞冠本身擴軍idea唔錯，更多唔同國家地區球隊可以參加亞冠呢啲高水平比賽，可以拉近彼此間嘅實力距離，而馬來西亞、香港同新加玻球隊最近兩季都分別喺分組賽對中日韓球隊開始拎到分數，唔再係一面倒，證明亞冠比賽有助大家進步。而家咁縮減隊伍法，好大機會又拉近番距離。呢個改制唯一好處就係會令亞洲三線球隊有多啲洲際比賽機會，但對我哋香港呢啲亞洲二線地區毫無幫助。