曼聯球迷不滿當地時間星期六夜晚八點開波 其實香港球迷一樣苦

常言道 Football without fans is nothing ，但各地聯賽賽會安排賽程或者開賽時間嘅時候周不時都無徹底考慮到球迷嘅感受，The Athletic 尋日就呢個議題探討，事關英國當地曼聯球迷可能會喺呢個週末睇完愛隊作客賓福特嘅英超比賽之後回程返曼市嗰陣面臨嚴重嘅阻滯。
曼聯將喺當地周六時間晚上8點（格林尼治標準時間）作客賓福特，但當地復活節周末維修工程可能會迫使英國當地曼聯球迷至少留喺倫敦直至星期一。當地由倫敦到曼市嘅尾班火車將會喺當晚8點02分開出，下一班要等到星期一。

曼聯支持者信託（MUST）對於賽程安排議表示不滿，認為開波時間時未曾考慮到球迷。一位發言人接受《每日郵報》訪問：「可悲嘅係，球迷們似乎總係喺確定開球時間時被忽視。今次係今個賽季第四次曼聯星期六晚上八點作客比賽，正好表明電視公司同足球當局對於觀眾嘅無視。」

其實港超今季同樣有嚴重嘅賽程編排問題，季前編可以到亂七八糟，搞到一隊波同一個比賽日踢兩場都夠膽死。不過而家就算「執好咗」，問題都仍然一大堆。點解可以同一個周末可以有菁英盃、足總盃同聯賽進行呢？究竟係咩天才編出黎？
不過最嚴重都係開賽時間，本身入場人數已經一千人都無，你仲要成日玩同時間兩場一齊開波，咁咪平均每場更少人囉！香港就係夠細，好處係可以俾球迷一日走兩場或者三場，以前夠癲嘅可以入場睇哂佢。但係而家成日全部痴埋哂，究竟有無考慮過球迷呢？

其實最理想就係一個星期五場聯賽，一場放喺星期五夜波，另外四場就星期六日每日兩場，唔同時間開波。本身呢兩季港超有深水埗、香港U23呢d球隊令到聯賽吸引性已經俾幾年前更低，其實係咪可以喺其他方面做番好少少呢？