識條蔥系列：婚禮既野，我識條蔥咩
前排朋友聚會，有位男士分享佢黎緊場豪華婚禮。由於係佢既未來老婆一手包辦， 而該位女士仲要 Kate Middleton 上身，認為自己出嫁係公主大婚，所以擺酒要擺 Grand Hyatt (唔係沙田 Hyatt Regency 呀，人地嫌沙田呢D鄉下地方太cheap，係香港島灣仔港灣道1號既 Grand Hyatt)，戒指要 Tiffany，婚紗要 Vera Wang，再加埋 MUA、攝影師、司儀、禮金、嫁妝、兄弟姊妹等無數咁多雜項，剩係搞場婚禮，夾夾埋埋都要50萬。結果唔單止影 pre-wedding 地點要由華麗古典既歐洲改成中國既神聖大地，仲連 honeymooon 都冇得去，因為已經洗到褲袋穿哂窿喇。
即係咁。一日得廿四小時，就算俾盡你真係婚禮當日廿四小時不眠不休，為左佢而洗哂辛辛苦苦儲左唔知幾多年既積蓄，除左送你一句「食得鹹魚抵得渴」之外，我都唔知講咩好。至於點解大部分女人都要搞場世紀婚禮，可能係因為平時做慣毫不起眼既路邊小石頭，難得終於有個舞台俾自己表演加曬命、宣揚自己嫁得出，仲唔乘機搞大佢，咁既心態掛。至於台下究竟有幾多賓客係真心祝福佢、幾多係純粹因為冇得推走個紅色炸彈而被逼去睇場大龍鳳，並唔會係佢既考慮之列。
我知我知，「一生人一次」嘛 (雖然我都知而家好多人都唔係)，婚禮既野，我識條蔥咩。
圖片來源：weddingwoof.com