識條蔥系列：服務態度既野，我識條蔥咩 (一)
記得彭定康伯伯係離任之前曾經講過，佢最擔心既，係香港會死係部分香港人手上。筆者近排所經歷既來自香港人既厚此薄彼服務態度，就印證左呢樣野。
話說筆者放工時間都唔早，所以夜晚都費事要屋企留飯，通常都自己一條友食算。前晚去尖沙咀 The ONE，見好耐都冇去某間標榜食日本地獄拉麵、其實完全港式口味既連鎖食店，咪諗住去懷舊下。哇點知就黎料。門口冇侍應帶位，咁筆者咪自己行入去，睇下入面有冇位。點知行唔夠五步，某位惡形惡相、三四十歲既侍應阿姐，用一口流利既正宗廣東話，呼喝我，「小姐，你幾多位呀！？」完全聲大夾惡，好似我一行入去就得罪左佢全家咁。都算喇，筆者咪好聲好氣答佢，一位。然後阿大姐好惡咁話，「一位你去坐門口啦！」好喇，諗住求其食餐飯，由佢啦。然後隔離枱黎左兩pair操普通話既疑似自由行人士。等左一陣，阿大姐就拎茶過黎，明明擺疑似自由行人士都好地地，擺去我枱面果杯，係極大力咁 dut 落黎。冇錯，係 dut 落黎，大力到連D茶都濺左少少出黎。我心諗，係咪我踩親佢條尾呢，點解對疑似自由行就好聲好氣，對我就好似我斬佢全家咁？好啦，都諗住忍佢，好聲好氣叫佢「唔該寫野呀」。阿大姐以好串既態度睥一睥我，然後話「轉頭幫你呀」，跟住就走左去。但好明顯阿姐當時拎完茶過黎，兩手空空，係絕對可以寫野。
去到呢度，筆者真係當場忍唔住，即刻起身走人。究竟有咩令阿姐咁唔滿意我呢個小客人，令到佢要 dut 杯茶落去張枱度，然後仲要連寫野都咁既態度？如果你話佢係心情唔好，咁點解對隔離既疑似自由行人士就可以好聲好氣？香港人自己咁樣對香港人，俾人玩殘都係自己攞黎。今日筆者係某間戲院所遇既某事，又係咁。詳情留返下篇《識條蔥》再講。
圖片來源：www.theexeterdaily.co.uk