識條蔥系列：正常生活既野，我識條蔥咩
大家好，實在太耐冇上過喇，今日終於可以繼續寫識條蔥系列。話說筆者其實打左工都好幾年，真心發覺，我地呢種small potato，就算幾努力、幾為公司著想都好，仆心仆命嘔心瀝血，到頭來都係癡心錯付。因為絕大部分既老細其實並唔係真心想搵班幫佢搞好壇生意既員工，佢地只係要一堆機械人，上面話乜就做乜，永遠聽話，唔會反抗(最好唔出糧都唔會反抗添呀)，咁就最好喇。所以好多老細，不論國籍，都好鍾意香港既員工。點解？因為大部分人都係奴性夠強囉。條路平時都塞到GG，地鐵永遠逼到出門口一個二個變哂沙甸魚，行出街金舖藥房多過乜，連餐廳都執下一間執下又一間……呢種「正常生活」，反而係冇人出聲，冇人覺得咁樣其實好有問題。好喇，到有事發生喇，竟然一開聲就話「阻我返工」，言下之意即係好鍾意返工啦。咦咁請問點解平時又咁恨打風、又咁討厭誠哥既李氏力場呢？其實究竟係好鍾意返工定係好討厭呢……唉不過呢種愛恨交纏既感覺，我呢D食菜肉兼唔正常既厚多士，都係識條蔥架喇。
圖片來源：reasonsforgod.org