【咁直接?】《娛樂大家》-「女神」張曦雯指住陸浩話佢係龜!?

顯示分享連結
無左節日的加持，今集的《娛樂大家》的主題回歸番平常的主題，今次就講寵物。嘉賓方面就唔係好睇到有咩關連，但就有《三日兩夜》的「女神」張曦雯(Kelly)，平時《東張西望》都見到的陳庭欣(Toby)(黎緊又會係《三日兩夜》見到佢)，同埋新年流流都一定見到的「玲玲姐」麥玲玲。今集好少有一個嘉賓可以由頭帶到尾，可能呢D就係「玲玲師傅」的「實力」!


讀者可以參考以上片段。「Cheat Chat」環節入面，今次幾個嘉賓其實表演都唔錯，反而「娛樂家族」隊入面幾個就相對失色。之前走失左鸚鵡Shabushabu的陳庭欣，一黎就做左黃庭鋒的攻擊對象(今集黃庭鋒提到「女神」張曦雯原來係佢幼稚園同學)，不過陳庭欣好醒咁避開左。「玲玲姐」佢諗住「Set」陷阱俾人踩，但佢講到好似幫人睇相咁，所以其他人的警覺性反而高左，之後「玲玲姐」就係度講寵物風水的時候就連續「中伏」。跟住麥明詩(Louisa)想引張曦雯講貓同狗，於是就問佢想養多隻寵物會養咩的時候，張曦雯突然就話自己想養番隻烏龜(可能好多「女神」的小兵都想做個隻烏龜)。因為之前佢地有講過陸浩(陸浩明)個樣似烏龜，所以有人就即刻話:「係咪即係陸浩?」跟住吳若希(Jinny)再問張曦雯點解會養烏龜，「女神」居然指住陸浩就講:「因為嫌D烏龜好悶囉。」陸浩都即刻話:「咁又唔駛指住我GE。」


另外係《粵講粵㜺鬼》入面成日Cosplay的戴祖儀(Joey)有一下「自爆」都幾好笑，個陣佢頭上個牌係「講寵物性格」，佢其實個下都唔係專登諗住「Set」陷阱，只係應緊何雁詩，隨口講左句:「係唔係因為有D狗係蠢D架MA?」咁就中左招，但小編覺得佢呢下輸得有D唔抵，隻動物蠢D都真係算寵物性格?明明蠢就係一種病，無藥醫架MA。又或者學《愛．回家之開心速遞》入面的大小姐龍力蓮(林淑敏飾)咁講:「蠢係真係蠢，無得扮!」


今集除左「Cheat Chat」之外，「亮點」唔算多。反而係「Liza Magic」個到，個個參加者都好快估到(兩次仲要係「玲玲師傅」估中先)，就係「女神」張曦雯估得最耐，最好笑都係「女神」估唔中但又谷住道氣個下令人覺得佢好得意，唔知你又覺唔覺呢?


Ref: TVB

如果喜歡我們的文章，請即分享到︰

標籤: TVB  娛樂大家  張曦雯  陳庭欣  麥玲玲  戴祖儀