【又黑化?】《愛．回家之開心速遞》- Terry又要變番聰明仔?

顯示分享連結
《愛．回家之開心速遞》入面的Terry(李偉健飾)終於係編劇聽取民意(唔似某D高官咁)的情況下由「黑化」版終於變番大家熟悉的Terry，即係個個會俾大小姐龍力蓮(林淑敏飾)鬧蠢，又同舅父KC(歐瑞偉飾)好Friend，可以話係白淨番。但係Terry係醒目老細的時候，佢的個人魅力的確令佢可以喺二房果到吸引到人加入佢個陣營，例如: 法律部的阿John胡景騰(何啟南飾)。唔單止事業上順風順水，就連感情生活都叫有D著落，可以係「威龍潘金蓮」Anita(梁茵飾)同「垃圾清」(周梓盈飾)兩個入面二揀一。隨住Terry蠢番，係唔係所有野就打回原形呢?

讀者可以參考以上片段。阿John覺得Terry由聰明變番蠢，令到自己好似有種跟錯老細的感覺，而自己又好難番去二房，話哂「好馬不吃回頭草」，加上自己又唔想再同Jenny雷珍妮(陳偉琪飾)接觸，於是佢就諗住可以令Terry變番聰明，咁佢咪仲可以跟到一個醒目的老細。阿John佢知道Terry之所以咁醒，係因為「黃陸中醫」的針灸加電撃，所以佢就諗住將成件事再做多次，咁佢就可以得償所願。


阿John佢整親之後，就叫Terry陪佢去做物理治療。其實個個物理治療師就係之前誤打誤撞搞到Terry聰明咗的黃陸醫生。阿John就叫Terry去接受黃陸醫生的「療程」。咁宜家的Terry對人已經無咗「黑化」果陣的戒心，就聽阿John的建議去做療程。熟悉的畫面又再出現，Terry又一次針到成面都係針。正當黃陸醫生諗住用電流電撃Terry的時候，Terry的前秘書Anita(因為之前劇情已經交代佢番咗「尋寶圖」)就衝入黎阻止。點知Terry反而同Anita講，阿John叫自己黎接受「療程」係想令自己變番聰明，仲補多句:「咁我變番蠢，無盲到架。」同埋佢根本就認得黃陸醫生同部電擊機。係聽完Terry解釋自己點解仲肯接受多次「療程」之後，阿John終於良心發現放棄咗佢的計劃。


睇番宜家的Terry，其實可以話佢已經「進化」到V3版(之前的蠢Terry係V1，黑化版係V2)。因為佢係將V1的愛心同V2的智慧結合，明明都仍然可以料事如神，早一步估到對方點諗，但亦有對人的包容之心。聽落又好似阿John咁講，Terry又真係一個好老細嚟。同埋Anita已經唔係under Terry，但仍然咁緊張佢(印象中Anita只係關心又有錢又聰明的男人) ，唔通Terry同Anita遲D真係可以組成真CP?


Ref: TVB

如果喜歡我們的文章，請即分享到︰

標籤: TVB  愛回家  開心速遞  Terry  李偉健