【激戰】《倚天屠龍記》- 張無忌強行攻破「金剛伏魔圈」?!

顯示分享連結
下個星期的《倚天屠龍記》就會係結局篇，終於睇到主角張無忌(曾舜晞飾)個造型變咗(雖然小編覺得之前個造型順眼D)。最近幾集都開始多番武打場面，張無忌先同「掌門Look」的周芷若(祝緒丹飾)(好似佢之前做《三生三世十里桃花》的玄女)同練咗「九陰白骨爪」的宋青書(張超人飾)過番幾招。之後又同三大神僧渡厄、渡劫、渡難交涉(其實都唔係好分到邊個打邊個)，仲要面對強大的「金剛伏魔圈」，但就算張無忌識「九陽神功」、「乾坤大挪移」、「太極拳同劍」，加埋「聖火令心法」，都破唔到「金剛伏魔圈」。可想而知呢個圈有幾大威力。

讀者可以參考以上片段。神隱左一排的「混元霹靂手」成崑(樊少皇飾)又再現身，小編一直以為佢係光明頂一戰已經死左。張無忌亦都因為佢的關係先可以發現到佢的義父「金毛獅王」謝遜(黑子飾)。但係謝遜就俾少林的三大神僧看住，所以為左救義父，張無忌點都要同三大神僧開戰，但佢都破唔到「金剛伏魔圈」。所以佢同義父傾左幾句就要暫時撤退。


講到救義父，「張大教主」當然唔會輕易放棄。跟住佢就帶埋佢明教的上上下下去「拜訪」三大神僧。佢同「光明左使」楊逍(林雨申飾)加埋「光明右使」范遙(宗峰岩飾)組成「明教鐵三角」，再一次試下攻破「金剛伏魔圈」。但集明教最強三人之力，依然未能夠攻破「金剛伏魔圈」，英俊瀟灑的楊左使更加勇戰受傷。就算有張無忌幫佢療傷，情況都幾令人擔憂。


雖然張無忌兩戰「金剛伏魔圈」應該係最近幾集的最高級別戰鬥，但小編最印象深刻的反應係「未掌門Look」的周芷若「教訓」佢的前師姐丁敏君(因為宜家已經係佢徒弟)。之前小編都有講過丁敏君呢D「惡毒女」真係好「黑人憎」，成日都係度「蝦蝦霸霸」。之前都已經同周芷若有好多的積怨，今次佢又係其他師弟妹(預埋宋青書)面前頂撞由滅絕師太(周海媚飾)欽點的峨嵋派第四代掌門，周芷若亦都唔再俾面前師姐，一出就出佢最強的武功「九陰白骨爪」，真係打到丁敏君叫哂救命，丁敏君真係「有咁耐風流，有咁耐折墮」囉，唔知你又覺唔覺呢?


Ref: TVB

如果喜歡我們的文章，請即分享到︰