【權鬥】《白色強人》 – 楊逸滔YT要被逼「封刀」!?

顯示分享連結
《白色強人》暫時睇到最新嗰集，小編都係給予好評，因為覺得佢係「醫鬥」同做手術救人的場面中間拎到個平衡，又唔會太側重講醫療改革下的鬥爭，但係醫療事故而引起的因素又可以同「權鬥」掛鈎到。最新嗰集入面，號稱全香港係腦神經外科入面最叻的醫生楊逸滔YT(郭晉安飾)，就因為同院長呂仲學(姜大衞飾)的爭權而需要被逼「封刀」。


讀者可以參考以上片段。呂仲學係感覺到自己身體有事的時候(因為之前劇情交代佢去左搵唐明醫生(馬國明飾)，佢患有肺癌)，就即刻Call齊明成北醫院的管理層召開個緊急大會，內容就係要任明成北醫院的副院長YT「封刀」。因為之前幼稚園斬人案的犯人王志強(方紹聰飾)個手術救唔番(係度再讚下之前係《鐵探》都有好演出的方紹聰)，加上佢阿媽(馮素波飾)係立法會議員吳榮業(譚偉權飾)的推動下向YT追討賠償而引起社會關注，呂仲學就係呢個時候黎一個「借力打力」，乘機借呢件事再加佢搵出嚟的三個Case去「宣佈」YT「封刀」。


之前有網民話過，如果要鬥奸的話，姜大衞可以開班教下郭晉安點樣可以做好D，原本小編都係當笑話咁笑下就算，但睇完今集會議入面呂仲學同YT的爭吵場面，又幾認同部分網民的睇法。雖然話一個下屬「手指指」咁指住上司嚟話，又真係好有Guts同霸氣，但正正係咁有霸氣的情況下，YT的氣勢好似比下去咁。呂仲學一句:「YT啊，我宜家並唔係炒你魷魚WO……」就已然將將個種「奸味」滲出黎。之後再話:「YT，我召開呢個會唔係黎聽大家的意見，我係黎話俾大家聽，我已經落實左呢個決定!」呢下比起YT「手指指」，可以話更加有霸氣，亦可以話叫做KO咗YT。


雖然呢個會議爭論的場面係幾好睇，但小編覺得今集另外有兩Part都幾令人印象深刻。第一個就係德仔潘懷德(何廣沛飾)知道左Dr. So(Zoe)(唐詩詠飾)係佢師父的前妻個陣，專登去搵Dr. So叫佢師母，而Dr. So就話俾唐明聽:「呢個大眼仔要係最後一個知道我地以前關係的人」，呢Part叫做為緊張的劇情降下溫。另一Part就係機智細心的Dr. Yu余湛琛(蔣志光飾)佢發現去急症室求診的病人(無左隻手指)，就係另一個受到性侵犯的病人的侵犯者，呢下真係令人佩服! 唔知你又覺唔覺呢?


Ref: TVB

如果喜歡我們的文章，請即分享到︰

標籤: TVB  白色強人  呂仲學  姜大衞  楊逸滔  郭晉安