《好日子》 – 唔通劇集名都已經改錯左!?邊度有「好日子」

顯示分享連結
之前收視幾高的《倚天屠龍記》播完之後，就輪到《好日子》頂上，所以變左有機會一晚會見到兩次「George」張明偉(連埋《愛．回家之開心速遞》)，又或者一晚會見到兩次張達倫(《白色強人》入面的醫發局局長)。暫時睇左幾集，都唔係好知點解套劇叫《好日子》，明明講緊三十年前一單「私了」的「衰十一」案件，牽涉在內的兩男一女都視之為夢魘，齊萬碩(張達倫飾)、齊萬基(黃智賢飾)同卞慧晶(陳煒飾)三個之後都因為呢件事而分別離開埋齊家村，所以又點算係《好日子》呢?


讀者可以參考以上片段。劇集暫時講番現時生活的情節唔多，反而成日不斷咁回憶，呢個人回憶完件事，又到另一個人回憶番件事，變左相同情節的回憶就係一星期內係咁重覆出現。不過小編覺得尋晚個個版本的回憶先係最易令人明白的一個版本。網民講笑咁講話究竟齊萬碩需要幾耐先可以入到齊家村，今集佢終於都可以「達陣」成功。齊萬碩入番條村之後，舊地重遊就即刻諗番佢之前對卞慧晶做過的惡行。


鏡頭就交番俾年青版的齊萬碩(張明偉飾)同卞慧晶(吳嘉儀飾)，碩表哥一黎就俾表妹「攻擊」，一啖錫落去。齊萬碩俾人錫完仲可以問:「等陣，你做咩錫我?」原來表妹搞錯左個髮夾係碩表哥送，其實係另一位表哥萬基送。正當表妹諗住自己係「自作多情」的時候，碩表哥就好似「有食唔食?」咁拉番表妹(都係因為「George」係愛回家追熊心如個形象太深刻!)之後就因為年青版的齊萬基(容天佑飾)到左，所以齊萬碩就暫時「停火」，但之後佢都係酒後亂性，「女女女」左表妹慧晶。之後就隨住齊萬碩一路係村入面經過唔同地方，佢亦不斷諗番起個件事事後的情況，當中更加不斷被佢阿爸(敖嘉年飾)打罵。


小編雖然覺得劇名好似改錯左，但覺得齊萬碩呢個角色的選角係唔錯。「George」張明偉個樣又真係有幾分似張達倫，都係戴住眼鏡，斯斯文文咁GE款，當然張明偉初初開始俾觀眾知道係因為模仿「前韓國天團」Bigbang隊長G-DRAGON，所以俾人話係港版G-DRAGON。但佢做左「George」之後個樣相對樸素左好多，所以同張達倫個樣真係似似地，唔知你又覺唔覺呢?


Ref: TVB

如果喜歡我們的文章，請即分享到︰

標籤: TVB  好日子  張達倫  張明偉  黃智賢  陳煒