【無港普?】《懿想得到》- 幾有誠意的「非典型」綜藝!?

顯示分享連結
星期一出街的《懿想得到》，小編覺得係一個幾過癮的綜藝節目，當然因為之前睇宣傳片覺得應該會係一個幾搞笑的節目(黎諾懿扮「的士陳」講普通話個個宣傳片)，而且頭兩集的嘉賓有小編好鍾意的「男神」鄭伊健(因為細個睇數碼暴龍聽《自動勝利Let’s Fight》，當然唔係因為《古惑仔》的浩南哥啦)，梗係捧下偶像場。但睇完節目之後，發覺呢個節目同想像中的搞笑綜藝有D唔同，反而感覺上幾有意思。


讀者可以參考以上片段。小編好耐之前都知鄭伊健「快閃」TVB電視城呢件事，係因為要幫好朋友黎諾懿拍攝的新煮食節目《懿想得到》做嘉賓，個陣鄭伊健接受採訪個陣係以新煮食節目黎形容節目，因為可能個陣黎諾懿搵佢做嘉賓個陣都係咁樣同佢講，所以佢先會咁樣去形容。小編個陣都有估會唔會《懿想得到》就好似謝霆鋒(Nicholas) 自己主持的《12道鋒味》。咁當然兩樣野係好唔同，因為個節目係黎諾懿專登為左唔同的嘉賓去安排一連串的驚喜同埋活動俾佢地，而佢預先安排的野係唔會俾個嘉賓知(應該係掛)，所以節目睇落就好似有真人Show的感覺。鄭伊健做嘉賓個陣都唔知黎諾懿其實只係以煮食節目的名目去邀請佢，但節目的內容係專登為佢呢個朋友而設，真係有Heart!


其實要安排一D驚喜俾人係好難，因為你唔單止要對個個人有相當的了解，而且你安排的野以為已經係盡善盡美的時候，受的人未必係咁樣諗(相信好多人都有類似的經驗)。暫時睇黎諾懿為嘉賓安排的驚喜同活動都相當「到位」，雖然未計宣傳個陣有出現的嘉賓，實際上就得三位，分別係鄭伊健、「鼎爺」李家鼎同埋「家燕姐」薛家燕，但都令佢地好滿意。


為鄭伊健安排的，除左係TVB的Canteen試下做廚之外，亦有參觀電視城，玩氣槍、彈弓等環節，睇住兩個「大細佬」一齊係度玩，個畫面覺得好正，因為好難得見到藝人放開咁玩，始終藝人要顧及自己的公眾形象，但睇住黎諾懿鄭伊健佢地兩個玩，反而覺得佢地難得可以咁有「童真」。到「鼎爺」同「家燕姐」，佢地作為黎諾懿係演藝界的前輩，睇落唔覺佢地好有代溝，三個人一齊玩恐怖VR就好似阿仔帶去阿爸阿媽一齊佢玩咁樣，覺得佢地相處得好開心咁。小編都幾期待之後黎諾懿會為其他嘉賓安排D咩驚喜!

Ref: TVB

如果喜歡我們的文章，請即分享到︰

標籤: TVB  懿想得到  黎諾懿  鄭伊健