【買氣炸鍋前，要先理解】

有啲長，但如果你諗住買，建議睇下:
其實焗爐同氣炸鍋互補不足，焗爐空間大，但對流風令熱空氣流動得好慢，佢對流主要目的，係要做到焗爐熱力平均零死角，咁啲嘢去到邊都受熱平均，所以要預熱，亦唔建議焗到中途開著個門，驚洩走熱氣，要將走咗嘅熱氣係大焗爐填補返要用好多時間

氣炸鍋原理，係要令個熱空氣流動集中同快，所以大部份設計，個炸鍋個位好細，否則就做唔到呢個效果，熱空氣流動集中同快目的係模擬炸食物受熱個情況，亦因為咁，佢唔怕你開門洩走熱氣，佢一下子就可以填補返，佢優點令食物短時間内表面受到最高溫烹調，所以好多都要掃油噴油，增加炸食物個效果，另外如果本身個食材冇咩油份，用氣炸鍋就會令佢非常乾，始終不同油炸，但就比較健康用少啲油，缺點就當然係炸嘢空間細，

啲殷實商人又諗到方法呃人，就係將光波爐改稱多功能氣炸鍋去賣，話焗嘢地方大，仲可以代替焗爐，其實又係搵笨，光波爐空間大咗，熱空氣流動又散又慢咗，除非你焗啲食材好大，否則又做唔到脆炸效果
光波爐出現，主要係熱氣對流比傳統大焗爐快，咁樣就可以令食物快啲焗好，縮短傳統烹調過時間，但佢唔係用來做炸食物個效果，熱力無法似氣炸鍋咁集中，對流得咁快

三者各有特色，焗爐穩定產量高，氣炸鍋乾身香脆，光波爐快熱烹調時間短

氣炸鍋代替唔到傳統焗爐，反而大SIZE氣炸鍋勉強可以取代光波爐，而有光波爐又唔係成日要炸嘢的話，亦可以無視氣炸鍋

仲有，如果真係買氣炸鍋，都要買啲好品牌，唔好貪平去啲冇保養，冇得退換機地方買，係會貴啲，但產品安全比價錢重要