不專業足球週記 (五)

本地波既賽事繼續因為疫情關係所以停擺左，甚至乎連農曆新年既足總盃決賽都踢唔成。不過又咁講，就算踢得成，兩隊波都一段時間冇操，賽事既觀賞性都一定冇咁好睇。香港人最鍾意返工，但班職業球員而家想返工都唔得，認真淒涼，政府同業界既議員可唔可以諗諗計，又或者反思下係咪真係要清零清到咁絕？眼見英超意甲果啲理得你疫情係咪爆到七彩，照樣場場放人入場睇波，唔少比賽仲全場爆滿，香港球員應該好羨慕。
不過算喇，因為十幾隻倉鼠感染而要殺晒千幾隻小動物，仲要叫養緊既人交返隻倉鼠出黎殺，你仲預呢個政府同議員會為球員做啲乜？

反而香港既球隊響亞洲賽場就有唔錯既消息。

首先係傑志響亞冠盃小組賽既對手已經出爐，佢地身處J組，同組有泰國既清萊聯、上海上港同附加賽勝方。東方龍獅響亞協盃既對手就有澳門代表澳科鄒北記、中華台北既臺南市FC同附加賽勝方（有機會係理文）。而理文響東亞賽區既亞協附加賽對手就會係黎自蒙古既220體育會。

至於我所講既唔錯消息就係受惠於傑志同理文分別響亞冠同亞協取得唔錯既成績，而東方龍獅雖然小組出局，但都有小組第二，再加埋4年以黎球會系數既此消彼長，扣除左2018年既球會成績，香港球會竟然力壓中泰兩國進佔東亞區第三！根據亞冠既條件，香港係可以得到兩個亞冠分組賽名額同兩個亞冠外圍賽名額既。不過由於亞冠係要求參賽隊數不多於聯賽三分之一，所以下季港超要有12隊先可以全取2＋2呢四個席位。可惜既係，觀乎香港球圈而既環境，似乎要達成呢個條件應該有相當難度。
另外上期講過安達臣走馬上任香港隊教頭，佢上星期會見傳媒既時候就話要大打進攻足球。港足前隊長陳偉豪響FB即刻回應話其實佢地都想打，不過實力上有差距，可以點打？我又幾buy大豪呢個講法喎。先唔好講戰術上既執行難度，就算真係執行到，你試下對日本南韓大打進攻足球？不過既然安達臣有雄心壯志，我都好希望佢帶領既香港隊踢到進攻足球之餘仲可以取得佳職喇。

歐洲波方面，意甲榜首國際米蘭作客只能同阿特蘭大踢成0比0，滿以為AC米蘭可以乘機反超前坐上榜首，點知佢地帶啲爭議既情況之下輸1比2比護級球隊史柏斯亞。爭議點係下半場補時階段，一次史柏斯亞後防犯規而球證口快快吹左哨子冇比得益，結果雖然祖利亞美斯亞斯射入波但就冇計數。AC米蘭呢頭唔入，轉過頭就輸埋，由格耶斯反擊為史柏斯亞射入反超前一球。呢球吹罰間接令AC米蘭3分全失，球證響完場之後就即刻向AC米蘭一眾球員道歉，難得伊巴冇踢鳩佢。

其實我睇返精華，球證吹雞既時候祖利亞美斯亞斯同個波都有小小距離，不過就響一個絕佳既位置冇人看管等緊波到，球證當然可以做得好啲，但又未至於誇張到係吹返轉頭既。大家對呢球波又點睇？

好喇，下次再傾過波經！
btw有興趣既可以follow下我:

ig: leafopen3
instagram.com/leafopen3