紅魔日報︰ 對阿記熱身賽傷兩件！ 雲比沙卡去韋斯咸，馬斯奧爾加盟曼聯？ 30-7-2024
紅魔日報 2024年7月30日
1. 因為唔係幾得閒，所以早兩日對阿仙奴嘅熱身賽我到而家先有時間講一講。
2. 呢啲熱身賽，對戰果唔需要太睇重，坦克半場可以換走晒十個人，其實都係睇場上面啲球員有咩表現，多過重視個戰果。所以！竟然響呢啲咁既表演賽輸兩個重要既球員！真係！痴！撚！線！首先賀龍入波之後冇幾耐就傷出，前後十五分鐘都唔知有冇。新兵中堅約羅就踢咗半粒鐘就收皮…喂，踢個表演賽啫，唔好咁搏喇…
3. 今日睇到曼聯發報既短片入面，我見到賀龍有行入球場，不過正式操波果啲片就唔見佢，希望佢冇乜事喇。不過約羅似乎就冇咁好彩，根據網上唔同既消息流出，一時又話佢骨裂，一時又話拉傷肌肉有排抖，曼聯官方或者啲可信既媒體暫時冇乜消息流出，但老實講我自己就覺得一啲都唔樂觀。
4. 講返場波，其實都冇乜嘢特別，主要睇下球員狀態回升成點。同上季一樣，曼聯有威脅既攻勢同入波都係來自於反擊，似乎距離坦克佢心目中既果種足球仲係有啲距離。
5. 雙方都有派出唔少青年軍，上半場曼聯既防中哥利亞係幾有睇頭，佢跑動多，防守睇落幾硬朗，但傳波略嫌保守；另外左閘未來希望、17歲既阿瑪斯，進攻方面睇落係幾唔錯，但係防守方面唔知係咪因為發育未完成，個感覺就好似小朋友撞落大人度咁，而且意識有進步空間，輸第一球波雖然對方耶穌仔可能有少少越位既嫌疑，但係佢真係完全企咗響度舉手睇波，咁樣絕對唔係一個好習慣！當你英超真係有VAR，覆睇之後原來冇越位，咁你咪碌柒？
6. 至於其他青年軍，真係冇乜邊個好突出。調返轉，佢哋突出之處係佢哋同對手實力上既分野，輸第二球，右閘位63號既Scanlon對住夏維斯，真係好似一啲反應都冇就比後者殺咗入禁區輕鬆起腳射入。
7. 另外下半場換咗十個人，但係上場既幾個一隊成員都唔算表現得太好。艾力臣好似步頭好重，同埋好慢，老態呈現，而辛祖、安東尼、麥湯文尼表現都係水準之下。全場波最好既都係被練龍既奧拿拿，希望之後曼聯既比賽狀態會有所提升喇。
8. 今場波小將入面比較令人失望既係惠特利，開季三場熱身賽，頭兩場就算有啲沉寂，但係都會偶有靈光一現既射門，可惜既係射術都係爭啲。今場就好沉了。
9. 講下啲轉會消息，轉會大神Fabrizio Romano報導拜仁慕尼黑既右閘馬斯奧爾已經同意曼聯所開出既五年合約同個人待遇，拜仁同曼聯已經就轉會費達成協議，但呢單轉會最重要既係曼聯要賣咗雲比沙卡先至可以有錢進行。不過，呢單交易都樂觀既，雖然未有大神here we go，但係有啲韋斯咸隨隊記者已經講緊雲比沙卡大概會以一千五百萬英鎊既價錢轉會韋斯咸。未來幾日，應該所有嘢都會明朗化。
10. 另外，同樣係來自轉會大神Fabrizio Romano既可靠消息，馬斯奧爾既隊友，荷蘭中堅迪列特都一樣係等緊曼聯既轉會，不過佢既情況就複雜得多，因為雙方對轉會費既分歧好大。根據德國《圖片報》，因為拜仁有機會簽唔到利華古遜既泰亞，所以迪列特留低唔係冇可能。拜仁曾經向利華報咗兩次價分別係2,000萬歐元同2,500萬歐元，但都被利華古遜拒絕，利華古遜最少都要收3,000萬歐元，拜仁唔賣人，就冇錢買人。而曼聯對迪列特既報價係3,500萬歐元，拜仁要求€5,000萬歐元外再加浮動條款，雙方差距好大，咁啱拜仁新中堅伊藤洋輝骨折受傷，拜仁隨時企得更硬。
11. 跟住又係Fabrizio Romano既消息，係關於烏加特轉會既。巴黎聖日耳門借走烏加特持開放態度，但就需要曼聯加入強制性收購條款。烏加特仍然等緊，希望可以加盟曼聯。
12. 最後就係講下新球場，The Athletic 報導假如曼聯最終決定建立新主場，目標將是建造一座可容納十萬人的場館。發展小組已經就重建方案進行咗評估，目前聚焦於新球場嘅外觀同點籌集資金。曼聯新股東拉特克利夫爵士傾向於重建新球場，目前建造新球場嘅成本預計為20億鎊，由動工直至完工，需時約六年。
#不專業足球筆記 #足球專欄 #我愛紅魔鬼 #紅魔日報 #曼聯 #ManchesterUnited #FabrizioRomano #PSG #巴黎聖日耳門 #烏加特 #ManuelUgarte
#馬斯奧爾 #NoussairMazraoui #迪列特 #MatthijsdeLigt #韋斯咸 #Westham #雲比薩卡 #AaronWanBissaka
曼聯Youtube Channel︰ https://www.youtube.com/@manutddailyinfo
更多專欄內容︰ https://www.leafopenleafopen.com/unprofessional9up
更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938