紅魔日報 對陣富咸最後檢閱！ 迪列特、馬沙拿維可上陣 梳爾又傷要抖一個月 15-8-2024

紅魔日報 對陣富咸最後檢閱！ 迪列特、馬沙拿維可上陣 梳爾又傷要抖一個月 15-8-2024
Youtube影片版本︰

1. 唔經唔覺，聽晚英超就重燃戰火，打頭陣既係曼聯主場對富咸。

2. 啱啱由拜仁慕尼黑新簽返黎既中堅迪列特同埋右閘馬沙拿維已經官宣加盟，相信聽日一戰可以上陣。

3. 加上上場波麥佳亞已經可以復出，馬天尼斯上場又踢足九十分鐘，即使仲有連迪路夫既情況不明、約羅又重傷，但至少應該夠人用，唔會出現上季卡斯米路客串中堅既情況。如無意外，我覺得迪列特會同馬天尼斯一齊上陣，當然呢個只係我鳩估喇。
4. 不過左閘就大鑊啲，曼聯早前官方宣佈，左閘梳爾響之前練波嘅時候小腿受傷，將會缺席季初比賽，直至到首個國際賽期之後先復出，足足要抖成個月。

5. 唉，雖然受傷就大家都唔想既，但係如果梳爾當初唔係急住響歐國盃復出，而係專心養傷既話，結局又會唔會唔同？畢竟佢真係由2月就開始傷，中間都冇復出過。

6. 連曼聯名宿舒米高都對梳爾作出批評，話佢唔應該踢歐國盃。講真，歐國盃最尾三場你趕住復出係踢到啊，決賽仲要踢足90分鐘，然後返到黎球會又傷過，出人工既又係球會，要球會埋單…

7. 朗尼上季季尾冇指名道姓咁話曼聯陣中有人為咗歐國盃詐傷，我諗佢心目中一定係有梳爾在內…

8. 姑勿論點都好，梳爾缺陣至少一個月已成定局，係踢究竟係新人阿瑪斯踢左閘？定係由馬沙拿維同馬天尼斯客串左閘嘞。個人估計馬沙拿維會係最大機會。

9. 前鋒賀龍受傷，上場對曼城坦克就大打無鋒陣，效果就唔算太顯著，啲有威脅既攻勢都係兩隻翼帶動，中間曼治幾次搶點都慢咗少少。
10. 上場新簽既前鋒舒克斯一分鐘都冇出，都令我有啲驚訝，我仲以為最少會比佢踩下草添。

11. 不過睇一啲流出黎既操練影片，助教雲尼斯達萊都幾針對住佢同埋華舒福兩個做訓練，話唔定聽日佢可以處子登場。

12. 觀乎上場社區盾既比賽，曼聯基本上都做到唔少有威脅既進攻，但係把握力真係嚇撚死你，三個白金機會都可以唔入…如果照上場既表現黎睇，製造到攻勢唔係問題，把唔把握到先係問題。

13. 聽日就唔係夫添架喇，但比起上場對曼城，有新球員加盟之下，個正選陣容甚至後備名單都相對上較完整，正選十一個就唔估喇，希望聽日踢場好波，有好表現喇。


#不專業足球筆記 #足球專欄 #我愛紅魔鬼 #紅魔日報 #曼聯 #ManchesterUnited #富咸 #Fulham
#英超 #賽前檢閱


曼聯Youtube Channel︰ https://www.youtube.com/@manutddailyinfo
更多專欄內容︰ https://www.leafopenleafopen.com/unprofessional9up更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938