紅魔鬼賽後評 聯賽盃 曼聯 5-2 李斯特城 (30-10-2024)

雲佬首仗旗開得勝 聯賽盃5比2挫李城
1. 雲佬暫代領隊領軍既第一仗，響奧脫福主場迎戰李斯特城。

2. 換帥效應，預咗呢場波曼聯會反彈。

3. 唔太熟而家既李斯特城，但聽人講話出咗唔少副選。至於曼聯，都收起咗奧拿拿、艾歷臣、賀隆，但整體黎講都算係現有人腳入面既正選人腳。不過，我覺得與其話雲佬想搏盡，倒不如話而家傷兵唔少，尤其是中場中同埋後防所有位，所以都係焗出返呢班人，除非用青年軍，如果唔係選擇都唔多，比較意外係Amad都係後備出場。

4. 睇個比分係咪嚇咗一跳呢？但作為一個睇足九十分鐘既人我可以話比你聽，其實頭三十分鐘我覺得李斯特城係踢得好少少果隊，但係足球就係咁，響曼聯頭半個鐘唔算創造到太多攻勢既情況之下，憑住卡斯米路一下靚到癲既遠射，死角破網，真係神來之筆。
5. 三十分鐘之後，曼聯既攻勢就旺盛咗好多，加拿祖球不著地射門同般奴既運氣罰球，加埋卡斯米路既入波令曼聯以四比二領先半場。

6. 其實我哋輸果兩球都要打屎忽，第一球巴伊迪殊打手鎚撻手搞到對手有機會射，第二球欠運達洛治比個傳中波顏射落對手度射入，咁都要失兩球入更衣室。

7. 以波論波，純粹以場上表現黎睇，其實曼聯既表現同之前冇太大分別，都係上半場氣勢猛如虎，唯一唔同既係把握力稍為好咗少少，加埋有少少運氣。唔知係咪坦克黑仔，佢一走帶走咗啲黑氣，之前一場既上半場中兩次楣都發生過至少兩次，今次卡斯球遠射就貼住楣底入，般奴球罰球仲要改變人牆改變方向彈入，認真好彩。

8. 我唔係講笑，唔係講實力，係講運氣，有時真係黑開有路，唔止係講緊坦克，連日常生活我諗大家都有唔少呢啲頭頭碰著黑既經驗喇。

9. 今季坦克既曼聯，下半場通常走樣走得好犀利，今場下半場一開波，李斯特城都搶返唔少攻勢，如果喺果個時間被追成三比四，咁樣以今季曼聯既表現黎講，要捱到完場並唔係易事。

10. 好彩當曼聯受壓既時候，李斯特城又送件大禮，佢哋中堅回傳冇力比般奴截到，然後單刀射入，去到呢一刻，曼聯贏波都應該冇乜懸念。
11. 今場啲球員把握力稍有改善，但其實加拿祖、卡斯米路佢哋都有幾次黃金機會可以再入波，當然有miss chances其實係好正常，只係之前坦克手下時啲miss chances多到離晒譄啫。

12. 防守方面，始終都係有啲蝦碌嘢發生，今次面對半力出擊既李斯特城都失兩球咁既波，星期日面對近況大勇既車路士會點？

13. 球員方面，舒克斯、福仔繼續低迷，尤其是舒克斯，好似變咗做斷纜神器咁，呢一刻佢係咪成功既收購時間尚早不宜咁快下定論，但觀乎近期既表現黎講，似乎偏向負面多啲…烏加特、卡斯米路都踢得唔錯，連般奴都有回勇跡象。

14. 巴伊迪殊受到既考驗唔多，但果球傳中撻手真係幾肉酸，最後仲要導致失波，然後我follow既某個英文fans page即刻講︰「終於知道點解巴伊迪殊成日都冇得出…」不過，其實除咗呢球手鎚之外，其實佢表現都還好，只係佢受到既考驗唔多，下場聯賽盃要作客熱刺，如果佢仲係正選既話，相信果場先會見真章。

#不專業足球筆記 #足球專欄 #專欄 #我愛紅魔鬼 #曼聯每日情報站
#聯賽盃 #紅魔鬼賽後評 #MUNLEI #曼聯 #李斯特城 #足球 #賽後評#英超賽後評

更多專欄內容︰ https://www.leafopenleafopen.com/unprofessional9up
更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio


廣告時間 -

ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen

如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938