放榜前一日18歲嘅Client話：「我係好大壓力，但我唔可以唔行出嚟。」

呀欣（化名）係我client，啱啱DSE畢業，18歲。佢由6月開始就走上前線，直到依家，佢都係去哂每一個集會同遊行。我見咗佢幾個月，佢由DSE開始前已經有焦慮嘅症狀，會咬指甲咬到半塊指甲甩出嚟，更加出現咗腸胃焦慮症嘅症狀，成日會肚痛/腹瀉。
612，佢第一次依催淚彈，佢話嗰種感覺好辛苦，好似就嚟死咁。

然後佢就成日發惡夢。

7月9日，DSE放榜嘅前一日，佢約咗我見面，進行催眠治療。
佢話佢覺得好大壓力，但大壓力唔係因為放榜，唔係因為驚入唔到心儀嘅學系/大學，而係因為佢覺得好無助，但佢由呢場運動開始到而家，都無流過一滴眼淚。

進行催眠治療嘅時候，我哋身體會進入一個更加放鬆嘅狀態，而呢種狀態會允許我哋同潛意識溝通。好多時候，我哋會無意識地將一啲想法同情緒壓抑喺潛意識入面，但壓抑唔代表我哋解決咗呢啲情緒，呢啲情緒仍然會影響我哋，例如發惡夢、突如其來嘅驚恐等等。透過催眠，我哋可以同潛意識溝通，處理、釋法呢啲情緒同想法。
呀欣坐咗喺度，佢跟住我嘅指示，慢慢咁調節呼吸，慢慢進入深度放鬆嘅催眠狀態。

嚟到呢度，我見到阿欣喊咗出嚟。

「你慢慢話比我聽，你見到啲咩，諗起啲咩？」我講。

「我見到啲人係咁大叫『走呀！』，前面有個催淚彈出緊煙，後面大家好似癲咗咁走⋯⋯」呀欣一路講一路喊。

「你有咩感覺？」我問。
「我覺得好無助，我哋只係想要我哋應有嘅自由，點解啲大人唔幫我哋，仲要鬧我哋？同埋我⋯⋯我覺得好驚，萬一有咩事，仲有邊個會幫我，邊個會幫到我？」呀欣愈喊愈大聲，但釋放咗呢啲眼淚，對佢嚟講係好事。

呀欣講咗好多喺呢場運動入面見到嘅野，有人中槍、有人中咗催淚彈之後哮喘發作、有人比人用棍打⋯⋯每個畫面都好令人心寒，我想像唔到眼前呢個揹住個Melody背囊嘅少女，經歷咗咁多可怕嘅事。佢仲係個小朋友，唔應該要承受呢啲事。

「你而家幻想，你所有嘅恐懼同焦慮，變成咗一舊烏雲。然之後我每數一聲，呢舊烏雲都會變細十分一。」我同佢講。
「1」
「2」
「3」
⋯⋯

數到十，我叫呀欣深呼吸，然後慢慢帶佢離開催眠狀態。

佢張開番雙眼之後，我同佢傾咗一陣，終於見到佢放鬆咗一啲，我哋終於可以傾一啲「正常」嘅野––一個「正常」中學生會諗嘅野：grad trip去咗邊度玩、將來想過點樣嘅生活、想番咩工⋯⋯

之前嘅治療，佢話佢想做護士。我同佢傾下將來嘅生活，佢講到佢好想做白衣天使幫人，佢講到佢嚮往嘅護士袍，佢終於久違地笑咗一笑。

佢走嘅時候，我望住佢嘅背影，我知我幫唔到佢太多，只可以幫佢清理一啲壓抑咗喺潛意識入面嘅情緒同陰影，然後等佢繼續有力量去再面對之後嘅事。

JUPAS錄取結果8月5日公布，阿欣Whatsapp我話佢入到心儀大學嘅學系，我問佢心情有無好啲，佢話有，但聽日都係要出去。

身在香港嘅小朋友要面對嘅唔只係公開試，而係催淚彈甚至係子彈；佢哋要擔憂嘅唔只係入唔入到自己想入嘅大學，而係會唔會被捕，為咗追求佢哋應得嘅自由而斷送前途。
佢只係個小朋友，但每次出去都要擔心自己番唔番到屋企。諗到呢度我個心痛咗一痛，我只可以用Whatsapp覆佢一句「加油」。

廣東話冥想

*根據臨床催眠治療師之保密原則，文章中沒有披露任何個案的個人資料，個案亦經一定程度修改。

*插圖與人物完全無關