[港超球員巡禮系列] : 告別「菁英盃」 -- 鄭子森決意力爭上位
「身披9號戰衣嘅紅衫球員，喺尾柱接應隊友喺左路嘅大腳傳中，先用左腳控定個波，再冷靜吸過兩名曼聯守將，喺窄角度用右腳狂轟尾柱，為球隊追成2：2」
呢個9號紅衫球員會係邊個？係阿仙奴嘅拉卡錫迪，定係利物浦嘅費明奴？其實通通都唔係。佢係現時效力標準流浪嘅香港23歲前鋒鄭子森。呢一球就係佢代表香港代表隊U17上陣，對曼聯U16射入嘅金球。
好多本地波球迷對於鄭子森(森仔)嘅印象都係源自呢一個入波，或者認為佢係一個「菁英盃」專員。但其實佢喺今個賽季已經「超齡」，唔再係「菁英盃」專員。喺機緣巧合之下，西達就同森仔做咗個訪問，等球迷多啲了解呢一位不再「菁英」嘅土炮前鋒。「我小學嗰其實唔係踢波，係打乒乓波，喠打埋學界，都幾勁。」同其他足球小將唔同，森仔並唔係從小就接受足球訓練。「大概去到小五左右啦，有次朋友話踢波唔夠人就拉埋我去，從此就愛上咗踢波。去到中一個陣入咗葵青區隊，踢咗一年左右啦，就考入埋流浪青年軍。」睇嚟喺香港成為職業足球員，踢街波同踢流浪都係必經之路。
相比起其他足球小將，森仔嘅足球成長路確係平淡得多。「其實咁多年都無踢過啲咩香港青年軍梯隊，最多都係踢香港5人足球代表隊U20。」直至2017年，森仔嘅足球之路出現咗突破，入選香港代表隊U17，備戰亞青盃外圍賽。「當時收到郭sir(郭嘉諾，時任香港U17主教練)嘅徵召，好興奮，任何一個喺香港踢波嘅人，都一定想踢香港隊。」喺同年嘅8月，更加代表香港U17對曼聯U16射入世界波，呢個亦都係佢代表香港嘅第一個入波。「無諗過有得落場，喠入埋波，個一刻個腦係一片空白。呢個經歷一世都記得。」一個金球令森仔信心大增，決意踏進職業足球嘅世界。
踏入職業足球圈之後，森仔嘅發展尚算平坦，由效力理文流浪、理文、和富大埔、東方、標準流浪，森仔看似唔洗為落班而煩惱，佢亦都自認係一個幸運嘅人。
(相片來源: 鄭子森)
「坦白講，我覺得自己都幾幸運。我初初投身職業足球時嘅履歷一啲都唔吸引，相比其他隊友，我無踢過香港青年軍，又無拎過神射手、 MVP之類嘅獎，但都能夠有球會搵，係相當幸運。」而森仔嘅「幸運」亦令佢同佢效力嘅球會贏得多個本地錦標，更能一嘗亞洲賽嘅滋味。「雖然入行嘅時候履歷唔靚，但我依家履歷好靚咖。基本上可以贏嘅盃我都贏過哂：港超聯冠軍(效力大埔)、菁英盃冠軍加決賽MOTM(效力東方)、2019省港盃冠軍。效力大埔同東方嘅時候連亞協盃賽事都踢過，好多球員踢咗十幾年都未必試過。」
(相片來源: 鄭子森)
聽到呢到，可能會覺得森仔都犯上一般年輕人容易驕傲自滿嘅問題，但話風一轉，森仔開始好嚴肅咁講出自己所面對嘅問題。「的而且確喺贏咗好多錦標，但自問自己喺當中又出咗幾多力呢？除咗喺菁英盃中擔任主力之外，其餘時候都係做後備，拎嘅錦標都係抱大腿。我已經23歲，喺外國比我更後生，好似曼治、格連活個啲已經場場正選，幫球會贏錦標。我都好想場場落場搏命。」與其埋怨環境同際遇，森仔更傾向將問題集中喺自身能力不足嘅問題上面。「好似今季被東方放棄咁，開頭喺好唔開心。但諗返轉頭，新教練奴比度喺有畀機會我表現，但自己踢得唔好。好似亞協盃對蒙古220體育會咁。我正選咖，但踢得太差半場就畀教練換走咗，好嬲自己踢得咁差。」檢視自身問題，用腳踏實地嘅方式去改善自己，係成為一個成功運動員嘅不二法門。「今季加盟流浪，我好希望可以建功立業，唔想再比人覺得我只係"菁英盃專員"級數。自問天份比其他隊友低，所以每次練波前後都會去流浪會所做gym加操，希望展示到畀教練睇我係有心踢，係有做正選嘅能力。飲食方面亦都避免啲多油多糖嘅食物，希望可以保持到一個能應付高強度比賽嘅體格。」森仔嘅外貌雖然略帶一點青澀味，但對於足球嘅執著，卻遠比外表成熟。除咗喺球場內盡力訓練同比賽，係球場外對於健身同飲食控制都有一種自律嘅意識。(相片來源: 鄭子森)
作為一個香港職業足球員，森仔喺訪問結尾都對本地職業足球嘅發展有少少睇法。
「以菁英盃為例，佢嘅創立的確係比咗好多機會年青球員。特別係今年踢雙循環，至少有十幾場踢。但問題就在於之後點樣接軌，好多球員反而喺離開咗U22之後無班落，但明明佢哋經過幾年嘅磨練，達到超聯水平，但就要落甲組踢。」呢個可能就係本地足球最難解嘅死結。最頂尖嘅球員，落班同享受高薪絕對不成問題。U22嘅球員受惠於菁英盃，好多時都能夠落班。最苦無幫助嘅，就喺嗰一班離開咗U22，但又未成為頂級球員嘅中層球員。而一個健康嘅聯賽，唔能夠只喺得最頂尖嘅球員同啱啱從青年軍畢業嘅年青球員。
呢篇訪問出街嘅時候，香港代表隊U23已經開始集訓，備戰對柬埔寨同日本嘅兩場U23亞青盃硬仗。「兩隊都好強，柬埔寨球員體能好好，盤扭速度又快，好難應付。日本就更加唔洗講啦。我希望到時可以tackle到久保建英。」衷心希望森仔同香港隊喺嚟緊嘅亞青盃可以有好嘅表現。
*特別鳴謝: 標準流浪足球會﹑總監李輝立先生
呢個9號紅衫球員會係邊個？係阿仙奴嘅拉卡錫迪，定係利物浦嘅費明奴？其實通通都唔係。佢係現時效力標準流浪嘅香港23歲前鋒鄭子森。呢一球就係佢代表香港代表隊U17上陣，對曼聯U16射入嘅金球。
好多本地波球迷對於鄭子森(森仔)嘅印象都係源自呢一個入波，或者認為佢係一個「菁英盃」專員。但其實佢喺今個賽季已經「超齡」，唔再係「菁英盃」專員。喺機緣巧合之下，西達就同森仔做咗個訪問，等球迷多啲了解呢一位不再「菁英」嘅土炮前鋒。「我小學嗰其實唔係踢波，係打乒乓波，喠打埋學界，都幾勁。」同其他足球小將唔同，森仔並唔係從小就接受足球訓練。「大概去到小五左右啦，有次朋友話踢波唔夠人就拉埋我去，從此就愛上咗踢波。去到中一個陣入咗葵青區隊，踢咗一年左右啦，就考入埋流浪青年軍。」睇嚟喺香港成為職業足球員，踢街波同踢流浪都係必經之路。
相比起其他足球小將，森仔嘅足球成長路確係平淡得多。「其實咁多年都無踢過啲咩香港青年軍梯隊，最多都係踢香港5人足球代表隊U20。」直至2017年，森仔嘅足球之路出現咗突破，入選香港代表隊U17，備戰亞青盃外圍賽。「當時收到郭sir(郭嘉諾，時任香港U17主教練)嘅徵召，好興奮，任何一個喺香港踢波嘅人，都一定想踢香港隊。」喺同年嘅8月，更加代表香港U17對曼聯U16射入世界波，呢個亦都係佢代表香港嘅第一個入波。「無諗過有得落場，喠入埋波，個一刻個腦係一片空白。呢個經歷一世都記得。」一個金球令森仔信心大增，決意踏進職業足球嘅世界。
踏入職業足球圈之後，森仔嘅發展尚算平坦，由效力理文流浪、理文、和富大埔、東方、標準流浪，森仔看似唔洗為落班而煩惱，佢亦都自認係一個幸運嘅人。
(相片來源: 鄭子森)
「坦白講，我覺得自己都幾幸運。我初初投身職業足球時嘅履歷一啲都唔吸引，相比其他隊友，我無踢過香港青年軍，又無拎過神射手、 MVP之類嘅獎，但都能夠有球會搵，係相當幸運。」而森仔嘅「幸運」亦令佢同佢效力嘅球會贏得多個本地錦標，更能一嘗亞洲賽嘅滋味。「雖然入行嘅時候履歷唔靚，但我依家履歷好靚咖。基本上可以贏嘅盃我都贏過哂：港超聯冠軍(效力大埔)、菁英盃冠軍加決賽MOTM(效力東方)、2019省港盃冠軍。效力大埔同東方嘅時候連亞協盃賽事都踢過，好多球員踢咗十幾年都未必試過。」
(相片來源: 鄭子森)
聽到呢到，可能會覺得森仔都犯上一般年輕人容易驕傲自滿嘅問題，但話風一轉，森仔開始好嚴肅咁講出自己所面對嘅問題。「的而且確喺贏咗好多錦標，但自問自己喺當中又出咗幾多力呢？除咗喺菁英盃中擔任主力之外，其餘時候都係做後備，拎嘅錦標都係抱大腿。我已經23歲，喺外國比我更後生，好似曼治、格連活個啲已經場場正選，幫球會贏錦標。我都好想場場落場搏命。」與其埋怨環境同際遇，森仔更傾向將問題集中喺自身能力不足嘅問題上面。「好似今季被東方放棄咁，開頭喺好唔開心。但諗返轉頭，新教練奴比度喺有畀機會我表現，但自己踢得唔好。好似亞協盃對蒙古220體育會咁。我正選咖，但踢得太差半場就畀教練換走咗，好嬲自己踢得咁差。」檢視自身問題，用腳踏實地嘅方式去改善自己，係成為一個成功運動員嘅不二法門。「今季加盟流浪，我好希望可以建功立業，唔想再比人覺得我只係"菁英盃專員"級數。自問天份比其他隊友低，所以每次練波前後都會去流浪會所做gym加操，希望展示到畀教練睇我係有心踢，係有做正選嘅能力。飲食方面亦都避免啲多油多糖嘅食物，希望可以保持到一個能應付高強度比賽嘅體格。」森仔嘅外貌雖然略帶一點青澀味，但對於足球嘅執著，卻遠比外表成熟。除咗喺球場內盡力訓練同比賽，係球場外對於健身同飲食控制都有一種自律嘅意識。(相片來源: 鄭子森)
作為一個香港職業足球員，森仔喺訪問結尾都對本地職業足球嘅發展有少少睇法。
「以菁英盃為例，佢嘅創立的確係比咗好多機會年青球員。特別係今年踢雙循環，至少有十幾場踢。但問題就在於之後點樣接軌，好多球員反而喺離開咗U22之後無班落，但明明佢哋經過幾年嘅磨練，達到超聯水平，但就要落甲組踢。」呢個可能就係本地足球最難解嘅死結。最頂尖嘅球員，落班同享受高薪絕對不成問題。U22嘅球員受惠於菁英盃，好多時都能夠落班。最苦無幫助嘅，就喺嗰一班離開咗U22，但又未成為頂級球員嘅中層球員。而一個健康嘅聯賽，唔能夠只喺得最頂尖嘅球員同啱啱從青年軍畢業嘅年青球員。
呢篇訪問出街嘅時候，香港代表隊U23已經開始集訓，備戰對柬埔寨同日本嘅兩場U23亞青盃硬仗。「兩隊都好強，柬埔寨球員體能好好，盤扭速度又快，好難應付。日本就更加唔洗講啦。我希望到時可以tackle到久保建英。」衷心希望森仔同香港隊喺嚟緊嘅亞青盃可以有好嘅表現。
*特別鳴謝: 標準流浪足球會﹑總監李輝立先生