【殺人娛樂時代的「龍床盤」：好狠影評《密室逃殺》】

首先，有劇透，但劇透唔劇透唔重要，因為《密室逃殺》這套典型得不可以再典型的密室電影，我唔劇透，你睇到到時到候腦海都自己會劇透。
嚴格而言，數到《閃靈》甚至《吸血殭屍》，所有暴風雪山莊式的驚慄或者也算是密室電影。而這類電影的原初靈感，19世紀芝加哥連環殺手「H.H. 福爾摩斯」錯綜複雜的密室殺人旅館應該功不可沒，姦殺奪命足足230人，應該連拼圖殺人狂都要拜佢做祖師爺。


而現今「密室死亡遊戲類」電影的起源，1997年的《心慌方》可算是元祖，呢套密室迷必修經典神級處，在於一個介乎科幻同現實的殘酷設局，方方正正的理性幾何死亡陷阱無處可逃，而神秘線索問主角求生定求真，亦為鋪續集開定綠燈。
一如所有類型片種，一變成類型（genre），就一定係第一個做係天才，第二個係庸材，第三個打後係蠢材，無限繁殖的喪屍片就是最好解釋。而要殺出重圍，一係就如《恐懼鬥室》血腥level up，一係就係將劏房變棺材房，一副棺材拍哂的《buried》，完全實踐地產商本少利大「龍床盤」策略。萬千套閱後即忘的第三四流密室片，除了呃呎數壓低成本之外，又有咩大道理？


《密室逃殺》的尷尬處，在於密室電影延伸成現實世界的密室遊戲後，再feed back回銀幕，但答案又不過是「有錢人的血腥實況娛樂」這個濫俗得不可再濫俗的答案，人物塑造單薄犯駁。講「硬件」室內有雪景有歐洲風收縮房，公用設施再多花臣再浮誇，也掩蓋不了「實用面積」的薄弱，睇戲終究是睇人物睇故事，等於買樓你買會所只是花紙。
唯一有趣是交待了所有這類死亡遊戲的making of，我以前也時常想，拼圖殺人狂要請幾多人做production？邊個負責招標邊個做user exprience test？等於《屍殺片場》，睇厭喪屍的現代人，睇喪屍片點樣煉成其實仲有趣。


諷刺的是，當年《大逃殺》已經是要大審判的道德禁忌作，現在「密室」「逃殺」大家都見怪不怪變合家歡，時代進步愈食愈重口味，普羅觀眾變態程度實在也不下於本片的Final boss。現實裡的地產商，創作力量同殘酷連拼圖殺人狂都會嚇一跳。

話說回來，吹到量子芝諾悖論咁大枝野，最後都係講緊扑爆閉路電視扮死就是twist，我想最悖論之處，就是物理女生何解可以廖廖幾句就昆到死過翻生的男主角「為啖氣」就再向超高風險挑戰？呢份口才，唔做幣少唔賣保險真係最大浪費，起碼比起條黑鬼更加適合做基金經理。