【看世界】中國 “二次創作” 再度 “揚威國際” - 今次係葡萄酒

顯示分享連結
人人都話喺中國大陸冇嘢係冇可能而且任何嘢都可以係假，雖然經常會覺得心寒（特別係食物），但係有時候都不得不佩服佢地嘅創造力。最近喺成都就舉辦嘅一個大型中國食品、葡萄酒與烈酒展覽（又名為糖酒會），志在俾外國酒莊接觸國內嘅銷售商。不過，就係因為呢個展覽，國內嘅 “二次創作”可能又再一次 “揚威國際”，而著名嘅國際飲品雜誌就以標題 - “The Fake, The Fraudulent And the Lookalikes at Cheng Du Wine Fair” 黎報導是次活動。

文中指出，今次嘅最大“驚喜”就係發現著名法國一級酒莊 Chateau Petrus 嘅副牌葡萄酒 - Pacurs（當然係唔存在係世上），而前面嘅標籤印有 “Pacurs Trsdemark Holders License”；細心睇清楚D〜！唔係 “Trademark” ；樽身亦印住諸如 “Grand Vin”、”Good Chateau”、”Oak Wine” 等字眼；而當地公司對佢地呢個 Product 亦非常自豪，製作左一幅巨型海報大力宣傳。不過當記者問詳細 D 來源，其中一個職員就含糊解釋葡萄酒其實係低質大量買入、運到中國水域先至喺船上面裝瓶；後標籤則寫住 ‘Vin d’origine de l’Europe’，即係話只係源自歐洲，法國都可能唔係！售價方面則由RMB 20 (US$3) 至 RMB 50 (US$7.36) 不等，視乎喺係歐洲定係中國船上裝瓶 ……

而喺場地嘅呢一邊，記者又發現一彷製澳洲著名品牌 - Penfolds；喺中國 Penfolds 譯名為 ”奔富“, 比自家嘅”長城牌“ 出名得多；而呢間公司則將佢地嘅産品名直譯為 ‘Rush Rich’ 及 印有 同真正嘅 Penfolds 相似標籤；場中亦有一級酒莊 Chateau Lafite（中譯：拉菲）近似標籤、標榜自己為 “ 中国唯一合法拉斐 ”，事實上來自完全不同地區、唔同等級嘅葡萄酒。

其實同場仲有好多諸如此類名牌嘅仿冒品，當地職員被記者訪問嘅時候表示：“買呢D貨品嘅客人佢地根本都未必會知道，而公司本身只係 Playing Ca Bian Qiu (擦边球)”；小弟就會覺得，中國大陸咁大個市場，無論國內或者國外嘅商家都想分番一份；但係國內人咁樣自己人呃自己人，冇進步就必固之然，而謊言又唔會因爲講多幾次就變真話，塘水滾塘魚；宜家喺全球商品一體化嘅方向下，各位酒友就算喺香港買酒都要注意多D，應該選擇D信譽良好嘅酒商呀 〜！

圖片及新聞來源：https://www.thedrinksbusiness.com/2017/03/the-fake-the-fraudulent-and-the-lookalikes-at-chengdu-wine-fair/7/

Derekc：一個土生土長嘅80s香港人，過去的十年庸庸碌碌的工作、學習品酒到宜家於德國葡萄酒莊工作、鐘情於葡萄酒生活態度並希望將其推而廣之；有過一段外地生活體驗、一場意想不到的人生。如果大家喜歡小弟嘅文章請點按讚及分享到你的社交平台；另外如果大家有希望想睇到葡萄酒題目亦歡迎聯絡我，又或者可以傾下酒經 〜

Instagram : https://www.instagram.com/derekc_c/

Blogger : www.theworldwine.blogspot.hk

Facebook Page : www.facebook.com/Wine.Life.Style.HK

如果喜歡我們的文章，請即分享到︰

標籤: 葡萄酒  中國  wine  China  wine tasting  品酒