【#酒知識】自己落手揀酒冇難度？葡萄酒標常見詞彙逐個睇【法國篇 ( 三 ) 】

顯示分享連結
前兩集就為大家介紹左標籤 Format 及分級制度，相信各位讀者們對選擇葡萄酒已經有左一定嘅概念。但係唔知大家有冇試過「好想再飲多一次上次嗰支葡萄酒」？有時候，單靠記住酒標上隻字片語，其實要再搵番相同嘅酒都唔容易。
比方說你認得「Grand Cru」呢個字，同銷售員或酒友交流時直覺上多半會認為係黎自布根地 ( Burgundy ) ，而且仲係最高階等級嗰隻！事實上喺地理位置遠一點嘅阿爾薩斯 ( Alsace ) 産出的葡萄酒亦會以「Grand Cru」作分級 ; 若果係波爾多地區則會泛指一類優質酒莊之葡萄酒。位於該地區内不同次産區又會有不同分級系统，尤其是喺聖埃米利安 (Saint-Émilion) 嘅「Grand Cru」级酒莊只屬第三等級，較「Premier Grand Cru Classé A／B（特優質酒莊)」及「Grand Cru Classé（優質酒庄)」更低兩級，而且喺酒價上更相差一段距離，所以要多加留意。
正所謂「差之毫釐，繆以千里」，葡萄酒標上嘅詞彙只不過係相差一個字，風格、産區及品種隨時可以完全唔同晒。當然喺宜家呢個科技年代，各位可以話「搞咁多嘢做乜吖，用手機影低佢咪得囉！」又或者就係因為時代轉變， “ Google 大神 ” 幾秒鐘解答左問題，幾分鐘之後你就可以唔記得，就好似想當年查字典學英文轉為 “ Google Translate ”咁 …. 個人黎講我比較 Old School，知識都係記喺自己個腦入面總好過假手於人，以下亦係一個唔錯嘅例子：
同為香檳 ( Champagne ) 而且出自相同釀酒廠，精明嘅你一睇已經知道左邊同右邊比較就有兩組英文字唔同左，之但係又代表乜嘢意思呢？答案係甜度 ( Sweetness ) 嘅分別；氣泡酒特別係香檳，之所以會有甜度其實係關乎一個釀造過程叫「Dosage」，視乎風格而定會於裝瓶前將「Sugar」或「Grape Must」加入酒中，而由 “不甜” 到 “特甜” 更可以分為七個等級如下：

  • Brut Nature : 含極微量只有 0 - 3 gram / Litre 殘余糖份，可謂接近完全不甜。
  • Extra Brut : 特干、不甜；完全不添加糖份，殘余糖份只有 0 - 6 gram / Litre。
  • Brut : 干、不甜；香檳最普遍常見的風格，或添加少量含 0 - 12 gram / Litre 糖分；若無標示，多屬於此類。
  • Extra Dry : 微甜，糖分含量 12 - 17 gram / Litre，帶有非常細微的甜度。
  • Dry / Sec : 略甜，含糖量為 17 - 32 gram / Litre，可說是普通甜味。
  • Demi Sec ： 含糖量為 32 - 50 gram / Litre，一字記之「甜」。
  • Doux : 非常甜，含糖量 50 gram / Litre 或以上，可謂香檳中甜度最高。
最後喺完結呢篇文章之前，再同大家開心 Share 多一個詞彙。香港人習慣填鴨式教育，死記硬背應該就冇乜難度，難就難在一 D 虛無縹緲嘅嘢，例如「Cru」。法文單字一個「Cru」可以係泛指葡萄園，但就唔可能準確地被翻譯；因為呢個字並冇固定解釋，喺不同地區、不同環境，會代表不同嘅意思。
喺波爾多，「Cru」通常係指一款酒，例如上面提及過嘅 Grand Cru Classé；而喺布根地，「Cru」則指一塊葡萄園，例如 Grand Cru。而「Cru」仲會出現在 Champagne、Alsace、Beaujolais、Rhône Valley、Provence，基本上各自有都有唔同解釋。又舉例說，喺香檳「Cru」係指一條村莊。布根地的 “Romanée-Conti” 係 Grand Cru，屬於特級葡萄園；香檳的 Ambonnay 又係 Grand Cru，不過 Ambonnay 竟然係一條村莊？天啊！What the fxxk！至於去到 Rhône Valley，「Cru」更會變成一個 AOC，例如 Hermitage；仲未講到 “Cru Bourgeois” 呢個分級制度呀 ..... 各位親愛的讀者們，下期再會吧 (￣∇￣)

*部分圖片來源引自互聯網 *
---------------------------------------------------------------------------------------------------------------
Derekc：一個土生土長嘅80s香港人，過去的十年庸庸碌碌的工作、學習品酒到於德國葡萄酒莊工作、鐘情於葡萄酒生活態度並希望將其推而廣之；有過一段外地生活體驗、一場意想不到的人生。如果大家喜歡我嘅文章請點按讚及分享到你的社交平台；另外如果大家有希望想睇到葡萄酒題目亦歡迎聯絡我，又或者可以傾下酒經 〜

Instagram : https://www.instagram.com/derekc_c/

Facebook Page : www.facebook.com/Wine.Life.Style.HK

如果喜歡我們的文章，請即分享到︰