【#酒知識】葡萄酒標字樣差少少，價格質素竟然可以大不同？【法國篇 ( 四 ) 】

顯示分享連結
記得喺【法國篇 ( 一 ) 】嗰時同大家介紹過 “ Mis en bouteille au Chateau ”、呢個只會喺法國葡萄酒標籤上面先可以見到嘅詞彙，用意喺話俾消費者知：酒瓶入面嘅酒係由酒莊親自裝瓶、封瓶。黎到呢個點，讀者們可能會認為冇乜特別，因為喺概念上作為生産者嘅酒廠理應係一條龍完成作業；不過若然你真係咁諗的話，買酒嘅時候就更加要留意；因為，仲會有以下呢兩個 Terms：「Mis en Bouteille A la Propriété」及「Mis en Bouteille Par ……」點解要搞咁多嘢？不如就等我同各位講個故仔。
話說喺好耐好耐以前，玻璃容器仲未用機器量產，要人手吹製嘅玻璃樽除左貴價之外，品質及容量亦頗為參差。有錢人家會將葡萄酒連橡木桶一併買入放喺家中地窖，要飲用時由桶中直接取飲；而一般老百姓則通常會去酒館飲杯裝，甚或係自備容器去酒館斟酒。咁當然亦會有人將酒液倒入玻璃瓶中，自行裝上軟木塞保存，但係就只屬少數唔太常見；之不過，由酒莊釀酒到消費者手上，中間其實仲夾著一個「銷售酒商 ( Merchant )」嘅角色。最常見嘅手法係，佢地會將低價酒混入高價酒莊嘅酒桶當高價賣（ 查實宜家喺中國大陸都時有發生)。
就喺呢個「欺詐遊戲」持續左若干年後，終於有酒莊肯為左維護自家聲譽而作出改革，由 Chateau Mouton Rothschild 首創於酒莊中自行裝瓶，並喺酒標上註明「Mis en Bouteille au Chateau ( 酒莊封瓶 )」嘅字樣。呢項創舉引起各大波爾多酒莊效法，後期甚至擴展至法國各地而成為另一項品質保証，令消費者放心酒液中唔會出現假酒摻混嘅問題。不過唔好以為咁就完結，因為之後仲發展出多其他裝瓶字樣；而就係差嗰少少，可能就足以令你揀嗰支酒大大不同𡃓。
Mis en Bouteille A la Propriété：Propriété 喺法文意指「物業」or「公司」，亦即係葡萄農可能只係種植葡萄、或者將葡萄釀製成原酒，之後就由某「公司」作統一收購、調配及裝瓶，再喺酒標冠上「公司」或品牌名稱作銷售。以往通常呢類收購葡萄或原酒再裝瓶嘅産品，都係屬於較低級或日常飲用酒款；不過，某 D 知名度極高嘅公司會嚴格要求果農必須依照指定方式栽種，並嚴格管控品質，且該公司長久以來保持信譽良好，所以品質仍有保證及酒價偏高。
Mis en Bouteille Par ......：後接代裝瓶廠之名稱。通常呢類酒款，都係品質極一般嘅餐酒。由於部分酒莊規模較細，無力購買裝瓶設備，所以會將釀好嘅成酒會交由裝瓶廠代工；甚或係某些酒商喺購入各莊園之原酒後混合，再由裝瓶廠入樽封塞。不過，喺勃根地 ( Burgundy ) 亦會有例外；因為田地、品質與極小產量、且受愛酒人士所追捧，所以部分佔地極少嘅果農會自行釀酒委託裝瓶，雖然酒液是委外裝瓶的，因此售價也同樣高昂！
Mis en Bouteille au Domaine：意思上 Domaine 可解作「酒廠」或「酒莊」，而 Chateau 雖然都會被翻譯為「酒莊」，但實際意義則偏向「城堡」或「莊園」。此品質保証上其實等同於 “ Mis … Chateau ”，不過因為葡萄園上並無古堡或莊園，只有為釀酒而建造嘅工坊。酒莊嘅登記係喺工坊裡頭，所使用嘅葡萄全由該 Domaine 擁有，而釀酒過程全都喺 Domaine 中進行一直到完成裝瓶。
引用法國以外、特別係新世界，通常酒莊擁有嘅葡萄園面積都唔細，而投入嘅資金亦鉅；廠內擁有裝瓶及封瓶設備，平常到就好似大家屋企要有門窗一樣，所以並冇特別標明係咪由酒莊自行入樽。
唔經唔覺，介紹關於閱讀葡萄酒標嘅文章已經黎到第四集，大家覺得如何？之所以會選擇法國作為開端，係因為我知道喺好多人心目中法國酒出名、貴價、高級，但同時中伏位亦都唔少而並非因爲個人偏好。唔知再繼續寫落去，之後會有嘅德國、西班牙、意大利及新世界篇，各位又會唔會繼續支持呢？下次再見！

*部分圖片來源引自互聯網 *
---------------------------------------------------------------------------------------------------------------
Derekc：一個土生土長嘅80s香港人，過去的十年庸庸碌碌的工作、學習品酒到於德國葡萄酒莊工作、鐘情於葡萄酒生活態度並希望將其推而廣之；有過一段外地生活體驗、一場意想不到的人生。如果大家喜歡我嘅文章請點按讚及分享到你的社交平台；另外如果大家有希望想睇到葡萄酒題目亦歡迎聯絡我，又或者可以傾下酒經 〜

Instagram : https://www.instagram.com/derekc_c/

Facebook Page : www.facebook.com/Wine.Life.Style.HK


如果喜歡我們的文章，請即分享到︰