疫情下嘅轉會窗完結 數字背後嘅玄機
夏季轉會窗完滿結束，唔知各位球迷，你哋對愛隊今個轉會窗嘅動態滿唔滿意呢？對我而言，轉會窗投放嘅資源越多，可以反映球隊嘅財力，同埋班主對隊波嘅著緊。經過武漢肺炎嘅洗禮後，球會嘅轉會策略，唔多唔少都會有改變。唔係個個班主都願意投放資源落球隊身上。究竟今個轉會窗嘅生態有冇改變？
英超無視肺炎影響 支出遙遙拋離
多年嚟，英超都係轉會淨支出最多嘅聯賽，近年單係夏季轉會窗，淨支出都超過6億鎊，18/19球季更加達到9億。肺炎下，普遍英超球隊都冇收緊開支，今年轉會淨支出接近8億，係近五年嘅第二多。可見肺炎冇令英超球隊改變轉會策略。英超球隊嘅一大收入來源係轉播費，而事實上，呢筆收入雖然因為肺炎而減少，但不至於冇錢收，大部份球隊仍然會花錢買人。佢哋嘅轉會支出繼續遙遙拋離其他聯賽。
意西德要開源節流
相比之下，意甲丶西甲丶德甲今年使少咗好多。淨支出方面，呢幾個聯賽嘅淨支出都比上年少。西甲同德甲更加喺轉會市場錄得正數：巴塞嘅情況大家都好清楚，要有出先有入，所以佢哋都賣走咗施美度，甚至要免費放走蘇亞雷斯同維度，以減低薪金負擔。西甲嘅巨額買人，只有比真歷，但唔好唔記得，呢單交易同艾法美路有關。另外馬體會嘅莫拉達，原來今年先俾轉會費。德甲方面就賣走咗夏費斯丶華拿丶堤亞高等人；意甲方面，國米正式賣走伊卡迪丶阿倫同舒希克都離開意大利，仲有好多轉會費唔大嘅買賣。呢幾個聯賽都係支出比上年少，收入比上年多，可見佢哋樂於賣人之餘，亦唔捨得買人。當中又以西甲最明顯，上季支出(未計收入)達12億鎊，今年只得3.6億。一個聯賽使得少係偶然。如果兩個，甚至三個聯賽使得少，就好大機會同疫情有關。
只有車仔願意豪花過億
每年總有兩至三隊球肯喺球天用上超過1億，「大洗」常客不外乎曼城丶皇馬丶巴塞同PSG等。今年佢哋不約而同，減少使費。只有車路士一隊嘅淨支出超過1億，而車路士今年花費多，原因係上年被禁轉會，冇乜點用過錢。從豪門嘅轉會開支可以得出，佢哋喺轉會市場有所制肘。巴塞上面已經有簡單提過；皇馬稍後會講；PSG除咗買斷伊卡迪之外，就只係從西維爾簽入沙治奧列高，用上500多萬鎊，明顯比以往少動靜。用返我上面嘅分析，英超球隊受肺炎影響較少，曼城使費都多，只係唔夠1億。今年淨支出最多嘅5隊都係嚟自英超，分局係車路士(1.54億)丶列斯聯(9460萬)丶曼城(8560萬)丶熱刺(7660萬)同維拉(7410萬)。而淨支出最高嘅十隊之中，只有柏爾馬同西維爾唔係英超球隊。
皇馬冇使到一分一毫
皇馬幾乎每年都有重點收購，例如上季買入夏薩特，前季買入高圖爾斯同雲尼施奧斯。不過今季一早講明，佢哋受武漢肺炎影響，今個轉會窗唔會買人，最終佢哋只係將奧迪加特回收，成為一隊新成員。離隊球員就有唔少，佢哋成功賣走列基朗同夏基美兩名借將，占士同巴爾都離隊。皇馬今年有超過8000萬鎊轉會收入。由佢哋嘅轉會窗動作推測，疫情對皇馬打擊好大。