米蘭打吡：埋門一腳勝過一切

顯示分享連結
今個周末有好幾場同市打吡，筆者之前有分析過默西塞德郡打吡，未睇嘅朋友轉頭可以過去睇下(https://s.fanpiece.com/TvpqoWE)。今篇文章就同大家離開英超，去到意大利，做個米蘭打吡嘅簡單分析。賽前AC米蘭喺意甲三戰全勝；而國米受到武漢肺炎影響，加利亞甸尼，巴斯東尼等人無法上陣，連埋傷停，佢哋有9名球員缺陣，所以干地都要擺幾位年青球員落後備。

國米係控球較多嘅一隊，攻勢都較多。佢哋主要透過兩種方法進攻：第一就係干地用到出曬名嘅翼衛壓前。今場國米兩邊翼衛分別係夏基美同佩列錫。助攻力好強。兩邊邊路傳中對AC米蘭造成好大威脅。佢哋喺3-4-1-2陣式下，前場經常有五個進攻點，理論上，會令到打四人後防嘅AC米蘭相當狼狽，所以AC米蘭中場基斯要經常拉落嚟防守。

即使係咁，由於國米兩邊翼衛拉得好闊，所以經常冇人看管。好似呢個攻勢咁，佩列錫首先左邊空曬，及後夏基美兜過基斯身後埋門，可見AC米蘭後防唔算跟得好貼。
https://i.imgur.com/CAP7J88.gif

而國米另一個攻擊方法，係利用盧卡古身形，為隊友鋪橋搭路。盧卡古喺國米做到一個支點嘅角色，用身位壓過對手，同時為隊友開路，或者放長傳轉邊。講到支點不得不提車路士前鋒基奧特。我認為佢比基奧特優勝嘅地方，係佢活動範圍較大，同時跑得更快，除咗支點之外，亦可以做到其他工作。
https://i.imgur.com/IBPO15k.gif

國米今場比賽唯一一個入波，就係兩者嘅結合：先係盧卡古擔身位再分後，國米一轉邊，由高拉洛夫同佩列鍚二打一，最後後者傳中搵到盧卡古撞入。
https://i.imgur.com/HjrwuEu.gif

國米嘅逼搶都唔弱，佢哋前面幾位球員：馬天尼斯丶盧卡古丶加上巴列拿同維度爾，會一邊向前逼，一邊截斷對方短傳路線，AC米蘭被逼用長傳向前，較難組織。不論用高波定地波向前傳，AC米蘭都經常因此失去控球。今場AC米蘭爭頂成功率只有43.6%，冇乜制空優勢。而且國米球員一直向波逼搶，AC米蘭後場冇乜時間搵傳波目標，即使最前有伊巴，都唔係經常傳到佢度。
https://i.imgur.com/t0jJ4hc.gif

AC米蘭逼搶就冇咁積極，雖然前場同樣有多位球員切斷短傳路線，但係當個波喺國米門將漢丹奴域腳下，唔會有球員主隊向其壓逼，佢可以睇準向前大腳長傳。而因為國米前面有盧卡古，佢哋可以將個波攞落嚟，或者二傳俾隊友，所以AC米蘭呢招對國米作用唔大。

AC米蘭今場進攻簡單直接，幾腳波就將個波踢上前面，因為國米兩邊翼衛慣常壓前，佢哋後場人數較少。伊巴雖然名義上係單箭頭，但佢實際上周圍走，經常回後現位，或者喺中堅之間嘅空位遊走。佢今場進攻時嘅活動範圍好大，整個半場都見到佢嘅身影，防守就主要留喺前場等反擊，好少回防幫手，不過佢都39歲喇，唔回防可以理解嘅。

AC米蘭十分鐘就搏得十二碼，佢哋由後場搶到波，都殺入對面禁區被犯規，只係傳咗四腳波，亦睇到伊巴走位相當出色。十二碼漢丹奴域救出，但伊巴反應快，成功補中。
https://i.imgur.com/o4ccNuy.gif

佢哋入嘅第二球亦都幾相似，守轉攻用嘅時間好短，呢球伊巴走位同射門觸角都係教材級。而控球在腳嘅話，AC米蘭主要係靠兩邊傳中，今場佢哋總共有16次傳中。
https://i.imgur.com/LBOH70F.gif

總結
唔講比數嘅話，其實呢場比賽國米較為優勝。國米制造多次機會；AC米蘭以反擊為主，踢為較為被動。然而國米射門18次，6次中目標，預計入波xG達2.55，只係入得一球，表現令人失望z好似上面其中兩段咁，國米其實應該要做得更好。相反AC米蘭預計入波有2.05，唔計射失十二碼(最後都成功補中)，應該要入嘅波佢哋都入到。伊巴全場射咗五腳就攻入兩球，反觀盧卡古同馬天尼斯合共射門13次，先係入到一球，呢個就係把握力嘅分別。呢場米蘭打呲再次提醒我哋，戰術就算幾好，埋門一腳先係入波最重要嘅一環。

如果喜歡我們的文章，請即分享到︰

標籤: AC米蘭  國際米蘭  意甲