【公平咩】歐洲足協宣佈唔會追罰拉莫斯

岩岩過去既一個星期，應該好多利物浦球迷都覺得好唔開心，原因係歐聯決賽不敵皇馬，之後卡利奧斯災難性既演出，再加上沙拿被拉莫斯侵犯而受傷，就算利物浦簽入左法賓奴，都仲未可以蓋過上星期發生既所有事。日前有一個利物浦醫學治療師就話沙拿既傷勢至少都需要三到四個星期去康復，而最壞既情況就會係沙拿將要錯過世界杯所有既小組賽賽事。就算沙拿可以係三星期之內完全康復，亦都好難趕上對烏拉圭既第一場比賽，仲未計埋球員需要時間去恢復狀態既因素。埃及國家隊既3場小組賽對手分別係烏拉圭﹑俄羅斯同沙特，分別將會係6月15﹑20同25號踢。 咁講返重點啦，皇馬球員沙治奧拉莫斯係歐聯決賽做出左兩次比較大爭議性既動作，所有球迷討論到今次今日都仲討論緊應唔應該處罰佢，但係歐洲足協就係今日終於回應左呢個問題。當時係比賽既49分鐘，拉莫斯係一次拚搶當中用手肘打中左卡利奧斯既頭部，2分鐘之後卡利奧斯就出現左一個莫名其妙既犯錯令賓斯馬射入呢場比賽既第一球，唔少球迷都認為拉莫斯呢個動作侵犯左卡利奧斯，但係歐洲足協係今日俾出既答覆就係唔會處罰拉莫斯。 歐洲足協認為球證當時睇唔到十分嚴重既犯規，因此並唔可以追罰拉莫斯。因為從電視畫面可以睇到雲迪克當時有推拉莫斯既動作，之後拉莫斯先會撞向卡利奧斯，所以佢地認為呢D證據唔足以處罰西班牙人。除此之外，歐洲足協仲表示佢地無收到利物浦方面對於拉莫斯既行為而作出既投訴，即係話紅軍方面無因為拉莫斯侵犯沙拿同卡利奧斯既行為作出後續既投訴，所以歐洲足協係公佈左唔會處罰拉莫斯之後，呢件事件亦正式完結。
值得一講既係有網民係網上發起追罰拉莫斯既請願，而在網站上有份請願既人數已經超過50萬，今次拉莫斯既行為相信除左激嬲左唔少利物浦球迷之外，亦令埃及人對拉莫斯十分反感。拉莫斯今次對沙拿作出既動作被歐洲柔道聯盟表示呢個動作係一個危險既技術，叫做WAKI-GATAME，而係柔道比賽中呢招動作亦係被禁用既招式。當然有人亦都會認為拉莫斯唔係有心去侵犯沙拿，但係根據拉莫斯平時既踢法，有心定無意就要交由咁多位自己判斷啦，歐洲足協唔進行處罰，球會亦都做唔到D咩，我地宜家唯一希望既係沙拿可以快D好返，趕及世界杯所有既賽事。