【我的離開也是愛】古天奴重返晏菲路竟然被人噓

世界杯就快開始，巴西就係尋晚首先進行左第一場熱身賽，呢場熱身賽最終巴西以2:0擊敗克羅地亞，但係賽果都唔係最重要既野，呢場比賽比較值得留意既係進行比賽既球場，呢場熱身賽正正係係利物浦既主場晏菲路球場進行。踢呢場比賽之前馬些路等人係利物浦會徽前面影個張相已經引起左唔少球迷既討論同不滿，因為岩岩過去既歐聯決賽正係利物浦對皇馬，而呢位皇馬大將呢個時候黎玩啲咁既野明顯有啲唔尊重場合。
好啦咁講返重點，古天奴重返利物浦主場可能對於佢自己黎講亦都好興奮，但相信佢唔會估計得到球迷既反應，今年年初古天奴以大約1.42億英鎊離開左紅軍，轉投巴塞隆拿，當時呢個消息亦令唔少紅軍球迷心碎，同時佢地亦都唔願意去原諒古天奴背叛球隊既行為。相信睇過波既球迷都知道係比賽開始之前，現場既主持會宣讀正選球員個名，而係主持人讀到古天奴既時間，有唔少球迷仍然拍手去支持呢位前利物浦球員，但係明顯亦有唔少球迷因為不滿而報以噓聲。雖然古天奴離開左利物浦，但係巴西人離隊之後利物浦既成績並未有受太大既影響，最終紅軍保住第四名，更成功殺入歐聯決賽。
呢位前利物浦球員係比賽之後亦有接受訪問，但係佢並唔係去講自己重返晏菲路既心情，而係佢大讚利物浦球員沙拿同國家隊隊友尼馬。佢認為呢兩位球員都會係世界杯上面再一次證明自己，古天奴話:「對於某啲球員黎講，世界盃係一個俾佢地展示實力既舞台同機會，C朗拿度同美斯已經統治左球壇好多年，所以我認為未來既情況應該會有所改變。我覺得沙拿同尼馬係最有機會取代美斯同C朗嘅兩位球員，我相信佢兩個係世界杯上會表現得好出色，自從沙拿加盟左利物浦之後，佢表現一直好引人注目，相信佢會成為晏菲路既下一任球皇，而且仲會持續一段長時間。」
古天奴既離開雖然係令到唔少球迷感到唔開心，但係當時邊個又會估到沙拿會表現得咁出色，令人慢慢去忘記左古天奴？有時候離開唔一定係錯，古天奴嘅立場好明顯，佢認為巴塞係一支佢理想去追隨嘅球隊，所以當巴塞為佢提出報價既時候佢毫不猶豫就接受。但去到巴塞之後又係咪做得返自己係利物浦所達到嘅高度呢？呢一點留返球迷自己去判斷，而沙拿就用自己嘅表現去證明左自己同埋回報返高普對佢嘅賞識，佢今季做到嘅野更多到世界各地球迷認同。小編就覺得始終古天奴都踢過利物浦，佢再一次返黎我地應該尊重佢，而唔係再向佢報以噓聲。