肥賓的季初啟示
季初令一眾皇馬迷咋舌既，相信就係邀請「譽滿華倫」（只限華倫西亞）既肥賓成為教練。憑佢切底既勇氣同實力、成功重組多支球隊至全新高度（你懂的）既經驗，實在令一眾皇馬迷汗顏。
肥賓收歛 轉會操作正常
肥賓至今仍然未有太大既操作出現，沒有出現如執教利物浦時放走沙比等柒頭行為，實屬驚喜。觀察球隊進出，肥賓的操作頗為恰當。門將方面放走下滑的卡斯拿斯，扶正信心實力並已觀摩一年的拿華斯，引入自家青訓卡斯拿一舉兩得；如果轉會市場關閉前成攻購入迪基亞，更加增添門將實力。後防方面將干查奧外借，損失佢既拼勁但無損球隊既實力。左閘馬些路鐵打正選；右閘加入丹尼路，配合原先既卡華積同艾比路亞，必要時可以由右閘頂替左閘。
中場方面加入高華錫，踢法積極向前、可擔任球隊發電機；前季迪馬利亞居中、以及上季中段摩迪受傷，引證皇馬進攻必須要有發電機（唔係Playmaker，唔係Ozil、James）才能推動球隊進攻。簽入高華錫，待此子適應完畢，相信到季中就會開始發揮作用。回購卡斯美路頂替基迪拉離開、外借盧卡斯觀望收成。本季人員配備比上一季更完善，應有更大彈性對付傷患。
進攻方面，本季相信是謝斯及伊斯高關鍵一年。經歷上季既慘痛傷患之後，於本季熱身賽中擔任過攻擊線各個位置，爆發力、把握力依然，本季需要進一步發揮與眾星察應的實力，以及改善突破能力，對謝斯自身及球隊戰績都會有很大幫助。伊斯高入隊第三年，控球力強的特點明顯，以其實力應該可發更大的牽制力、吸引防守球員引出空擋。歸根究底取決於伊斯高能否進一步開闢自己的視野，為進攻打出一片天。至於季初引進的華基斯，實力平均，相信引進目的是填充球隊的自家青訓名額。
戰術炸彈 C朗與巴利
另外，從季初兩場西甲的戰術可見，肥賓將巴利正式搬入中路，觸球更多、推進成功更多、射門更多、察應更多，令球隊多點進攻、多點開花，對推動戰績的作用會愈見明顯。相反C朗比賽中好少有觸球機會，但咁唔重要，因為近幾季C朗其實已經切底改變踢法，成為純入球機器，本質上同巴利既踢法並無衝突。
真正既問題在於葡萄牙球星是否感到快樂。C朗入到波佢就會同你笑；如果佢入唔到波，唔笑，媒體就會四起圍剿皇馬，無論如何都會令士氣受影響，更加會C朗同巴利既關係更加雪上加霜。經歷上季巴利被圍插獨食唔傳、激嬲C朗之後，以致安帥指明巴利要傳球，令到巴利開始居邊、唔突破、唔射波，進入平庸模式。而要修補呢段關係，除左需要唔知幾多個巴利比C朗既助攻，更重要係C朗自己入唔入到波、感唔感覺到被重視（睇佢表情就知），所以作為球迷，實在寄望C朗盡快打開入球之路，亦都寄望肥賓懂得識時務者為俊傑，唔好似689咁講錯野。
執著的盡頭 手腕待正
睇直播重有一樣野留意到肥賓同安帥、摩連奴唔同既地方，就係肥賓成日都一副食唔安、坐唔落、提少一句驚死班球星會犯錯既樣。既然球迷都留意到，球員就更加會感受到。肥賓以戰術行先、感情行後；完美主義、執著細節，憑佢缺少支持者既一點可以預見，肥賓最大既挑戰在於管理球員既手腕，能唔能夠使到將士用命、為佢拼盡全力打江山，將會成為本季球隊的隱憂。
歡迎留言討論，不喜請插，增加點擊率！